ТӨЛЕБИДЕ ҚҰҚЫҚ БҰЗУШЫЛЫҚТЫҢ АЛДЫН АЛУ МӘСЕЛЕЛЕРІ ТАЛҚЫЛАНДЫ

Төлеби ауданы әкімдігі жанындағы құқық бұзушылық профилактикасы жөніндегі ведомствоаралық комиссияның II тоқсандық отырысында құқықтық тәртіпті сақтау, қылмыстың алдын алу және тұрғындардың қауіпсіздігін күшейтуге қатысты өзекті мәселелер қаралды.
Аудан әкімі Еркеғали Әлімқұлов төрағалық еткен жиынға құқық қорғау органдарының басшылары, мемлекеттік мекемелердің өкілдері мен жауапты сала мамандары қатысты. Кездесу барысында аудан аумағындағы криминогендік ахуал сараланып, құқық бұзушылықтардың себептері мен оларды азайтуға бағытталған нақты шаралар талқыланды.
Комиссия отырысының күн тәртібінде мүліктік қылмыстардың алдын алу, заңсыз ойын бизнесіне қарсы күрес, қаржылық пирамидалардың жолын кесу, қылмыстардың ашылу көрсеткіштері, тұрмыстық зорлық-зомбылықтың профилактикасы және балалардың жазғы демалысы кезіндегі қауіпсіздігі мәселелері қаралды.
Жиында аудан көлемінде тіркелген құқық бұзушылықтарға талдау жасалып, олардың алдын алу бағытында атқарылған жұмыстардың нәтижелері баяндалды. Әсіресе соңғы уақытта жиілеп кеткен интернет-алаяқтық фактілері кеңінен сөз болды. Мамандар алаяқтардың жаңа тәсілдері туралы айтып, тұрғындарды сақтық шараларын күшейтуге шақырды. Азаматтардың жеке деректерінің қауіпсіздігін қамтамасыз ету және қаржылық сауаттылықты арттыру мәселелері де назардан тыс қалмады.
Сонымен қатар мал ұрлығының алдын алу бағытындағы жұмыстар да талқыланды. Бұл мәселе ауылдық жерлер үшін өзекті болғандықтан, жауапты мекемелерге профилактикалық шараларды күшейту, тұрғындармен түсіндіру жұмыстарын жүйелі жүргізу және бақылауды арттыру жөнінде ұсыныстар берілді.
Отырыста заңсыз ойын бизнесі мен онлайн-казинолардың қоғамға тигізетін кері әсері де қозғалды. Мамандар мұндай заңсыз әрекеттердің азаматтарды қаржылық қиындыққа ұшыратып қана қоймай, отбасылық тұрақтылыққа да кері әсер ететінін атап өтті. Осыған байланысты жастар арасында түсіндіру жұмыстарын күшейту және құмар ойындарға тәуелділіктің алдын алу шараларын жандандыру қажеттігі айтылды.
Комиссия мүшелері тұрмыстық зорлық-зомбылықтың алдын алу мәселесіне де ерекше тоқталды. Отбасындағы жанжалдардың алдын алу, әйелдер мен балалардың құқықтарын қорғау, әлеуметтік қолдау тетіктерін тиімді пайдалану бағытындағы жұмыстардың маңыздылығы сөз болды. Сондай-ақ отбасылық құндылықтарды дәріптеу, ерте некенің және ажырасудың алдын алу бойынша кешенді жұмыстарды жалғастыру қажеттігі атап өтілді.
Жаз мезгілінің басталуына байланысты балалардың қауіпсіздігі мәселесі де кеңінен қаралды. Мектеп оқушыларының жазғы демалысын тиімді ұйымдастыру, олардың бос уақытын пайдалы өткізуіне жағдай жасау, су айдындарындағы және жол қауіпсіздігі талаптарын сақтау бағытында нақты міндеттер белгіленді. Кәмелетке толмағандар арасындағы құқық бұзушылықтың алдын алу бойынша жүргізіліп жатқан жұмыстарға да баға берілді.
Жиын қорытындысында аудан әкімі жауапты мекемелерге нақты тапсырмалар жүктеп, құқық бұзушылық профилактикасы бағытындағы жұмыстарды күшейтуді тапсырды. Әрбір сала бойынша белгіленген міндеттердің орындалуы тұрақты бақылауда болатыны айтылды.
Қоғамдағы тыныштық пен тұрақтылық – жүйелі профилактикалық жұмыстың нәтижесі. Сондықтан құқық бұзушылықтың алдын алу, азаматтардың қауіпсіздігін қамтамасыз ету және құқықтық тәртіпті нығайту бағытындағы жұмыстар Төлеби ауданында алдағы уақытта да жалғасын табады.