ҚР Премьер-министрінің орынбасары Қанат Бозымбаевтың тапсырмасына сәйкес, бұл тәжірибені еліміздің басқа өңірлерінде енгізу жоспарланған. Осы мақсатта Қаржы, Өнеркәсіп және құрылыс министрліктерінің өкілдері мен еліміздің барлық облыстарынан келген 40-қа жуық делегация Түркістан облысына арнайы іссапармен келіп, өңірдегі өндірістік алаңдардың жұмысымен танысты.
Іссапар барысында делегация Сауран ауданындағы «SAURAN» өндірістік паркінде болып, нақты өндірістік жобалардың жүзеге асу барысын көрді. Атап айтқанда, жаңбырлатып суғару технологияларын шығаратын «BNK Group», жиһаз өндіретін «Aqniet Holding», өндірістік тоңазытқыш шығаратын «UBC Групп» сияқты кәсіпорындардың жұмысы таныстырылды. Сонымен қатар делегация өкілдері Сауран ауданындағы «Иассы», «Ескі Иқан», «Дәморда» және «Қарашық» шағын өндірістік парктерінің құрылысымен танысып, олардың инфрақұрылымдық мүмкіндіктерін бағалады.
Мамандардың пікірінше, шағын өндірістік парктер – шағын және орта бизнесті дамытуға арналған тиімді алаңдардың бірі. Бұл формат кәсіпкерлерге дайын инфрақұрылымы бар өндірістік орын ұсынып, жобаларды қысқа мерзімде іске қосуға мүмкіндік береді. Нәтижесінде бизнес ашу процесі жеңілдеп, инвестиция тарту қарқыны артады. Делегация мүшелері Түркістан облысында қолға алынған бұл бастаманы жоғары бағалап, оның өңірлік экономиканы дамытудағы рөлін ерекше атап өтті.
Бүгінде Түркістан облысының барлық аудан және қалаларында шағын өндірістік парктер қарқынды түрде дамып келеді. Жалпы 214 гектар аумақта 25 өндірістік алаң құрылған. Бұл алаңдарда 258 өндірістік ғимараттың құрылысы жүргізілуде. Қазіргі таңда осы ғимараттарда жүзеге асырылатын 251 инвестициялық жоба бойынша келісімдер жасалған. Жобалардың жалпы инвестициялық құны 192 млрд теңгені құрайды.
Аталған жобалар толық іске асқан жағдайда 5 218 жаңа жұмыс орны ашылады деп жоспарлануда. Сонымен қатар бұл өндірістер жылына шамамен 96 млрд теңгенің импортты алмастыратын өнімдерін шығарады. Бұл көрсеткіш өңірдің өндірістік тәуелсіздігін арттырып, ішкі нарықты отандық өніммен қамтамасыз етуге мүмкіндік береді.
Жалпы алғанда, Түркістан облысындағы шағын өндірістік парктер моделі – тиімді ұйымдастырылған индустриялық саясаттың нақты нәтижесі. Бұл тәжірибені еліміздің басқа өңірлеріне енгізу арқылы республика көлемінде өндірістік әлеуетті арттыруға, кәсіпкерлікті дамытуға және жаңа жұмыс орындарын ашуға жол ашылады.
