Бұл жарыс еліміздің әр өңірінен келген тәжірибелі балуандарды бір арнаға тоғыстырып, жоғары деңгейдегі тартысты бәсекені қалыптастыруда.
Биылғы ел біріншілігіне Қазақстанның түкпір-түкпірінен жиналған 20 команда қатысып, жалпы саны 1000-ға жуық спортшы бақ сынауда. Жарыс форматы бойынша қатысушылар М1 жас санатынан бастап М9 санатына дейін өзара күш сынасады. Әр жас деңгейінде 7 салмақ дәрежесі қарастырылып, әр салмақта үздіктер анықталады. Бұл жүйе әр буындағы спортшылардың шеберлігін әділ бағалауға мүмкіндік береді.
Аталған чемпионатта Түркістан облысының намысын қорғап жатқан спортшылар да аз емес. Өңір атынан 30-ға жуық балуан қатысуда. Олардың қатарында тәжірибелі әрі елге танымал спортшылар – Самат Рысбеков, Нышанбай Құдайберген, Сәкен Рүстемов және Дінмұхамет Розметов бар. Бұл спортшылардың халықаралық және республикалық деңгейдегі жарыстарда жинаған тәжірибесі жас буынға үлгі болары анық.
Жарыстың маңыздылығы тек ел чемпионын анықтаумен шектелмейді. Чемпионат қорытындысы бойынша жеңімпаздар мен жүлдегерлерге алдағы күзде Босния және Герцеговинада өтетін әлем чемпионатына жолдама беріледі. Сондықтан әрбір белдесу жоғары жауапкершілікпен өтіп, қатысушылар бар күш-жігерін салуда.
Түркістан төрінде өтіп жатқан бұл дода 6-9 сәуір күндері аралығында жалғасады. Осы уақыт ішінде жанкүйерлер тартысты белдесулерді тамашалап, отандық спортшылардың шеберлігіне куә бола алады. Жалпы алғанда, бұл чемпионат ұлттық спорт пен жекпе-жек түрлерінің дамуына серпін беріп, еліміздегі күрес өнерінің деңгейін тағы бір мәрте айқындайтын маңызды алаңға айналып отыр.
