ТӨЛЕБИ АУДАНЫНДА «ЗАҢ МЕН ТӘРТІП» ҚАҒИДАТЫ АЯСЫНДА ТҰРҒЫНДАРҒА ТЕГІН ҚҰҚЫҚТЫҚ КӨМЕК КӨРСЕТІЛДІ

Аталған шараның басты мақсаты – тұрғындарға тегін құқықтық көмек көрсету, қолданыстағы заңнама талаптарын түсіндіру, азаматтардың құқықтық мәдениетін қалыптастыру және құқықтық мәселелер бойынша нақты бағыт-бағдар беру.
Акция барысында тұрғындарды прокуратура, полиция, әділет, мемлекеттік кірістер басқармасы, жер қатынастары, жұмыспен қамту және әлеуметтік бағдарламалар, білім беру, тұрғын үй-коммуналдық шаруашылық салаларының, сондай-ақ өзге де мемлекеттік мекемелердің өкілдері қабылдады.
Қабылдау кезінде азаматтар өздерін толғандырған мәселелерін жауапты мамандарға тікелей жеткізіп, заң талаптарына сәйкес түсіндірмелер мен қажетті кеңестер алды. Әсіресе жер қатынастары, әлеуметтік төлемдер, кәсіпкерлік, салық салу, еңбек құқықтары, тұрғын үй мәселелері, отбасы құқығы және басқа да өзекті бағыттар бойынша сұрақтар қойылды.
Іс-шараға Төлеби ауданы әкімінің аппаратының басшысы – Әдеп жөніндегі уәкіл Амалбек Өміртай, аудан прокуратурасының прокуроры Алмас Әбдіраман, аудандық полиция бөлімінің қоғамдық қауіпсіздік бөлімшесі бастығының орынбасары, полиция майоры Ерболат Бейсембаев, сондай-ақ мемлекеттік органдардың басшылары мен сала мамандары қатысты.
Ашық форматта өткен құқықтық қабылдау барысында тұрғындар мемлекеттік органдар өкілдерімен еркін пікір алмасып, өз мәселелерінің шешу жолдары бойынша кәсіби кеңес алды. Мұндай кездесулер халық пен билік арасындағы байланысты нығайтып, азаматтардың құқықтық сауатын арттыруға және қоғамда заң талаптарын сақтау мәдениетін қалыптастыруға мүмкіндік береді.
«Құқықтық дәріхана» акциясы Төлеби ауданының бірнеше елді мекенінде ұйымдастырылып, тұрғындарға құқықтық көмектің қолжетімділігін арттыруға бағытталды. Бұл бастама азаматтардың өз құқықтарын білуіне, заңды мүдделерін қорғауына және қоғамдағы «Заң мен тәртіп» қағидатының берік орнығуына ықпал етуде.