Елді мекендердің инфрақұрылымын жаңарту, тұрғындарға қолайлы орта қалыптастыру, бұқаралық спортты дамыту және халықпен тұрақты кері байланыс орнату бүгінде мемлекеттік басқарудың маңызды қағидаттарына айналды. Президенттің «Халық үніне құлақ асатын мемлекет» тұжырымдамасы аясында тұрғындардың ұсыныстары ескеріліп, ауылдардың даму жоспары нақты қажеттіліктерге сәйкес қалыптастырылып келеді. Бұл жұмыстар «Әділетті Қазақстан» құру жолындағы маңызды қадамдардың бірі саналады.
Осы бағыттағы жұмыстар аясында Созақ ауданының әкімі Мұхит Тұрысбеков Жуантөбе ауылдық округіне жұмыс сапарымен барып, тұрғындармен кездесті. Ашық форматта өткен басқосуда аудан көлемінде атқарылып жатқан жұмыстардың нәтижелері сараланып, алдағы кезеңге жоспарланған жобалар таныстырылды. Сонымен қатар ауыл тұрғындарының ұсыныстары тыңдалып, оларды толғандырған өзекті мәселелер бойынша пікір алмасу өтті.
Кездесу барысында округтің өткен кезеңдегі жұмыстары қорытындыланып, ауылдың әлеуметтік-экономикалық даму көрсеткіштері талқыланды. Тұрғындар ауылда жүзеге асқан оң өзгерістерге ризашылықтарын білдіріп, аудан көлемінде іске асып жатқан жобаларға қолдау көрсетті. Жеке қабылдау кезінде жұмыспен қамту, әлеуметтік қолдау және тұрмыстық мәселелерге қатысты ұсыныстар айтылып, олардың әрқайсысы жауапты мамандардың бақылауына алынды. Мұндай ашық диалог мемлекеттік органдардың есептілігі мен халық алдындағы жауапкершілігін арттыруға ықпал етеді.
Жуантөбе ауылында биыл жүзеге асырылатын маңызды жобалардың бірі – заманауи спорт кешенінің құрылысын бастау. Бұл нысан ауыл тұрғындарының, әсіресе жастардың спортпен тұрақты айналысуына мүмкіндік беріп, бұқаралық спортты дамытуға серпін береді. Сонымен қатар Абылайхан және Әйтеке би көшелеріне орташа жөндеу жұмыстары жүргізіледі. Жол инфрақұрылымын жаңарту тұрғындардың қауіпсіз қозғалысын қамтамасыз етіп, ауыл ішіндегі қатынасты жақсартуға мүмкіндік береді.
Өткен жылы ауылда инфрақұрылымды дамыту бағытында ауқымды жұмыстар жүзеге асырылды. Қатты тұрмыстық қалдықтар полигонына апаратын жол жөнделіп, қиыршық тас төселді. Абылайхан көшесіне асфальт жабындысының төселуі жол сапасын едәуір жақсартып, тұрғындардың күнделікті қатынасын жеңілдетті. Мұндай жобалар ауылдың инженерлік инфрақұрылымын нығайтып, әлеуметтік-экономикалық дамуына оң ықпал етеді.
Қоғамдық қауіпсіздік пен тұрғындарға көрсетілетін қызмет сапасын арттыру мақсатында Қ.Омарұлы көшесінде жабық футбол алаңы, учаскелік полиция пункті және өрт сөндіру бекеті салынды. Бұл нысандар тұрғындардың қауіпсіздігін қамтамасыз етумен қатар, жастардың бос уақытын тиімді ұйымдастыруға және төтенше жағдайлардың алдын алу жүйесін күшейтуге мүмкіндік береді. Сонымен бірге ауылдық клуб пен мәдениет үйінің жөнделуі мәдени іс-шаралардың сапалы өткізілуіне жағдай жасап, ауылдың қоғамдық өмірін жандандыра түсті.
Жуантөбе ауылының сәулеттік келбетін жақсарту бағытында да маңызды жұмыстар атқарылды. Бәйтерек кешені толық абаттандырылып, аумаққа жаңа брусчатка мен бетон плиткалар төселді, жарықтандыру жүйесі жаңартылды. Бұл қоғамдық кеңістіктің тартымдылығын арттырып, тұрғындардың демалысына қолайлы орта қалыптастырды. Сонымен қатар ауыл орталығында жаңа саябақтың ашылуы тұрғындардың бос уақытын тиімді өткізуіне мүмкіндік беретін маңызды әлеуметтік жоба болды.
Инженерлік және коммуналдық инфрақұрылымды дамыту жұмыстары аясында бірқатар көшелерге жарықшамдар орнатылып, Ә.Жақсыбайұлы және Төле би көшелеріне жаңа тротуарлар салынды. «Шаңырақ» нысанында Құрмет тақтасының орнатылуы ауылдың қоғамдық өміріндегі маңызды жетістіктерді дәріптеуге ықпал етсе, бейнебақылау жүйелері мен безендірілген электр бағаналары елді мекеннің қауіпсіздігі мен көркін айтарлықтай жақсартты.
Жуантөбе ауылының өткен жылы «Үлгілі ауыл – 2025» облыстық байқауында ІІІ орын иеленуі де жүргізіліп жатқан жұмыстардың нақты нәтижесін көрсетеді. Бұл жетістік ауылдың инфрақұрылымын дамыту, абаттандыру және қоғамдық ортаны жақсарту бағытындағы жүйелі еңбектің жемісі болып табылады. Осындай табыстар тұрғындардың туған жерді дамытуға деген белсенділігін арттырып, ауылдың одан әрі өркендеуіне негіз қалайды.
