Көрмеде Бауыржан Момышұлының балалық шағы, әскери қызметі, отбасы жайлы тың деректер, сондай-ақ жеке заттары мен құжаттары қойылған. Экспозицияға полковник шеніндегі шинелі, батырдың өзі сызған әскери картасы, сондай-ақ “Ұшқан ұя” мен “Артымызда Мәскеу” шығармаларын жазған қаламы мен сиясауыты енгізілген.
Жамбыл облыстық тарихи-өлкетану мұражайында батырдың өзі тарту еткен жеке маузері, Кеңес Одағының Батыры атағы үшін берілген Алтын Жұлдызы мен Ленин орденінің көшірмелері, айдаһар бейнеленген қылышы, сирек кітаптары мен фотосуреттері сақталған. Сонымен қатар бейбіт күндердегі киген киімдері мен ыдыс-аяқтары – күміс қасықтар, ағаш тостағандар, қымыз шөміші, шай ішетін ыдыстар және домбырасы көрмеге ерекше мән береді.
Экспозицияда батырдың өрнектелген альбомдары, Құрмет грамотасы, Кеңес Одағының Батыры атағын беру туралы Жарлық және басқа да марапаттау құжаттары да ұсынылған. Көрменің бірегей жәдігерлерінің бірі – Бауыржан Момышұлы Қызыл Армия қатарына алғаш шақырылған 1932 жылы және запасқа шыққан 1956 жылы өзімен бірге болған чемодан, сондай-ақ соғыс кезіндегі батальон, полк, дивизия құжаттарын сақтаған темір сейф.
Сондай-ақ музейде батырдың киімі – шинель, етік, папаха, маузер қаруы, шығармашылыққа бет бұрған кезеңіндегі 70-тен астам қолөнер туындылары – оюланған фигуралар көрермен назарына ұсынылған. Осылайша, музей Бауыржан Момышұлының әскери және шығармашылық мұрасын таныстырып қана қоймай, келушілерге оның өмір жолын толыққанды сезінуге мүмкіндік береді.
