Ербол Мырзабосынов Қазақстан мен Ресей спорт саласында тығыз әріптестік орнатып, бірқатар бағыт бойынша бірлескен жұмыстарды сәтті жүзеге асырып келе жатқанын атап өтті. Оның сөзінше, Ресейдің спорттағы мол тәжірибесі мен инфрақұрылымдық әлеуеті қазақстандық спортшылар үшін аса маңызды, әсіресе қысқы спорт түрлерін дамытуға тікелей әсер етеді. Былтыр қазақстандық спортшылар Ресейде бірнеше оқу-жаттығу жиындарына қатысып, шеберліктерін шыңдады.
Сондай-ақ, 2024 жылы елордада өткен 5-ші Дүниежүзілік көшпенділер ойындарына Ресей спортшылары белсене қатысып, көшпенділердің ұлттық спорт түрлеріндегі шеберліктерін көрсетті.
Кездесу барысында екі министр спорттық ынтымақтастықты одан әрі нығайтуға мүдделі екендерін жеткізді. Қазақстан мен Ресей халықаралық деңгейде бірлескен бастамаларды дамытып, спорттық ірі іс-шараларды ұйымдастыруда өзара қолдау көрсетуге дайын екені айтылды.
