Мемлекет басшысы жариялаған «Әділетті Қазақстан» тұжырымдамасы аясында елді мекендерді газдандыру, жолдарды жаңарту, әлеуметтік нысандар салу және халықпен тиімді кері байланыс орнату мемлекеттік саясаттың негізгі басымдықтарының қатарына енгізілді. Бұл бағыттағы жұмыстар Президенттің «Халық үніне құлақ асатын мемлекет» қағидатымен үндесіп, тұрғындардың нақты сұраныстары негізінде жүзеге асырылып келеді.
Осы мақсатта Созақ ауданының әкімі Мұхит Тұрысбеков Жартытөбе ауылдық округінің тұрғындарымен кездесіп, өңірде атқарылып жатқан жұмыстар мен алдағы кезеңге жоспарланған жобаларды таныстырды. Басқосу барысында өткен жылғы нәтижелер қорытындыланып, биыл жүзеге асырылатын бастамалар кеңінен талқыланды. Сонымен қатар тұрғындардың ұсыныстары тыңдалып, өзекті мәселелер бойынша ашық пікір алмасу өтті.
Кездесуде аудан басшысы биыл Жартытөбе ауылдық округі үшін ең маңызды жобалардың бірі – газдандыру жұмыстары екенін атап өтті. Шолаққорған ауылындағы автоматтандырылған газ тарату стансасынан Жартытөбе, Аққолтық және Бабата елді мекендеріне дейін магистральды газ құбыры тартылып, оны ауыл ішіндегі көшелерге жеткізу жұмыстары жүргізілуде. Алдағы уақытта Аққолтық ауылында газ құбырларын сығымдау жұмыстары басталып, жыл соңына дейін аталған елді мекендерді толық көгілдір отынмен қамту жоспарланған. Газдандыру тұрғындардың тұрмыс жағдайын жақсартып қана қоймай, ауылдардың әлеуметтік және экономикалық дамуына тың серпін береді.
Жиын барысында округтің әлеуметтік-экономикалық даму көрсеткіштері де жан-жақты сараланды. Шағын және орта кәсіпкерлікті дамыту бағытында қолға алынған жобалар таныстырылып, бүгінде Жартытөбе ауылында оннан астам кәсіп түрі табысты жүзеге асырылып жатқаны айтылды. Бұл бастамалар жаңа жұмыс орындарының ашылуына, тұрғындардың табысын арттыруға және ауыл экономикасының дамуына оң ықпал етуде. Аудан басшысы мұндай тәжірибелердің өзге өңірлер мен шетелдің тиімді үлгілері негізінде енгізіліп жатқанын айтып, оларды аудан көлемінде кезең-кезеңімен кеңейту жоспарланғанын жеткізді.
Инфрақұрылымды жаңғырту жұмыстары биыл да жалғасын табады. Жартытөбе ауылындағы атауы жоқ №1 көшеге және Аққолтық елді мекеніндегі Бейбітшілік көшесіне орташа жөндеу жұмыстары жүргізіледі. Жолдардың сапасын арттыру тұрғындардың қауіпсіз қозғалысын қамтамасыз етіп, елді мекендер арасындағы байланысты нығайтуға мүмкіндік береді. Бұл жұмыстар ауыл тұрғындарының күнделікті өміріне қолайлы жағдай қалыптастыруға бағытталған маңызды жобалардың қатарында.
Өткен жылы Жартытөбе ауылдық округінде жиырма бес ірі әлеуметтік және инфрақұрылымдық жоба жүзеге асырылды. Соның ішінде Аққолтық ауылына дейінгі үш шақырымдық жолдың толық жаңғыртылуы көлік қатынасын едәуір жақсартты. Жол инфрақұрылымын дамыту ауылдың әлеуметтік-экономикалық әлеуетін арттырып, тұрғындардың еркін қатынауына мүмкіндік берді.
Абаттандыру бағытында да ауқымды жұмыстар атқарылды. Әкімдік ғимараты мен ауылдық клуб жөндеуден өтіп, Бабата ауылындағы саябақ жаңартылды. Жаңа балалар ойын алаңдары салынып, Жартытөбедегі «Астана» саябағында сахна орнатылды. Сонымен қатар Ардагерлер және Жастар саябақтары толық абаттандырылып, тұрғындардың бос уақытын тиімді өткізуіне арналған қолайлы қоғамдық кеңістіктер қалыптастырылды. Мұндай жобалар ауылдың сәулеттік келбетін жақсартып, тұрғындардың өмір сапасын арттыруға ықпал етеді.
Спорт саласын дамытуға да ерекше көңіл бөлінді. Жартытөбе ауылында жабық шағын футбол алаңы пайдалануға беріліп, елді мекендерде балалар және спорт алаңшалары орнатылды. Бұл жастардың бұқаралық спортпен тұрақты айналысуына мүмкіндік жасап, салауатты өмір салтын насихаттауға жағдай қалыптастырды.
Инженерлік инфрақұрылымды жетілдіру жұмыстары аясында көше жарығы жүйесі жаңартылып, жалпы ұзындығы 4,3 шақырымнан астам жарық желісі іске қосылды. Сонымен бірге бейнебақылау камералары орнатылып, қоғамдық қауіпсіздік деңгейі күшейтілді. Бұл жұмыстар тұрғындардың қауіпсіздігі мен жайлылығын қамтамасыз етуге бағытталған маңызды бастамалардың бірі болып саналады.
