WHATSAPP-ТАҒЫ ХАБАРЛАМАҒА СЕНІП, 3,5 МИЛЛИОН ТЕҢГЕСІНЕН АЙЫРЫЛДЫ

Күдіктілер мессенджерде өздерін жәбірленушілердің жақындары ретінде таныстырып, шұғыл ақша қажет екенін айтып хабарласқан. Сенімге кірген алаяқтар түрлі сылтаумен қаражат сұрап, оны өздерінің есепшоттарына аудартқан. Алаяқтардың құрбандарының бірі досының атынан келген хабарламаға сеніп, көрсетілген шотқа 3,5 миллион теңге жіберген. Біраз уақыттан кейін ғана оның жалған аккаунтпен хат алмасқанын түсінген. Полицейлер жүргізген жедел іздестіру шараларының нәтижесінде қылмысқа қатысы бар алты адам анықталды. Тінту кезінде олардың жалдап тұрған пәтерінен көптеген SIM-карта, ұялы телефондар мен планшеттер тәркіленді. Қазіргі таңда күдіктілердің басқа да қылмыстарға қатысы бар-жоғы тексерілуде. Тәртіп сақшылары азаматтарды әлеуметтік желілер мен мессенджерлерде келген хабарламаларға сақтықпен қарап, ақша аудармас бұрын ақпаратты міндетті түрде тексеруге шақырады.