Құрылтай отырысында Президент Конституцияның 46-бабына сәйкес Вице-Президент және Премьер-министр лауазымдарына кандидатураларды депутаттардың қарауына ұсынды. Мемлекет басшысы Вице-Президенттің жаңа мемлекеттік басқару жүйесіндегі айрықша рөліне тоқталып, бұл қызмет билік тармақтары арасындағы өзара іс-қимыл мен теңгерімді қамтамасыз етуде маңызды орын алатынын атап өтті.
Қасым-Жомарт Тоқаев Вице-Президент қызметіне Ерлан Қариннің кандидатурасын ұсынды. Президент оның мемлекеттік басқару жүйесіндегі көп жылғы тәжірибесін, кәсіби біліктілігін және елдің стратегиялық даму бағыттарын терең түсінетінін атап өтті.
«Ерлан Қарин – елге танымал азамат. Ол мемлекеттік басқару жүйесінде ұзақ жыл жұмыс істеді, көкжиегі кең, тәжірибесі мол, отаншыл азамат деп айтуға болады. Ауқымды реформаларды сапалы іске асыруға белсенді түрде атсалысты. Мемлекеттің стратегиялық бағдарын, даму жоспарын жақсы түсінеді», – деді Мемлекет басшысы.
Президент Ерлан Қариннің жаңа қызметке лайық екенін айтып, Құрылтай депутаттарынан оның кандидатурасын қолдауды сұрады.
Кандидатураны талқылау қорытындысында Құрылтай депутаттары Ерлан Қаринді Вице-Президент лауазымына қолдады.
Осыдан кейін Мемлекет басшысының Жарлығымен Ерлан Тынымбайұлы Қарин Қазақстан Республикасының Вице-Президенті болып тағайындалды. Осыған байланысты ол бұрын атқарған лауазымынан босатылды.
Ерлан Қариннің Вице-Президент қызметіне тағайындалуы Қазақстандағы жаңа мемлекеттік басқару жүйесінің қалыптасуындағы маңызды қадамдардың бірі болды. Конституцияға сәйкес, Вице-Президент Құрылтай депутаттарымен және Үкіметпен тығыз жұмыс істеп, Мемлекет басшысы айқындаған міндеттердің жүзеге асырылуына қатысады.
Жаңа лауазым билік тармақтары арасындағы өзара байланысты күшейтіп, мемлекеттік басқару жүйесіндегі үйлесімділікті қамтамасыз етуге бағытталған.
