Бұл туралы «Президент» жобасының жүргізушісі, журналист Әділ Балтабаев Мемлекет басшысы мен америкалық конгрессмендер арасындағы кездесуге қатысу барысында хабарлады.
Бұған дейін Қасым-Жомарт Тоқаев АҚШ Өкілдер палатасының бюджет және салық комитетінің төрағасы Джейсон Смит бастаған Конгресс делегациясын қабылдаған болатын. Кездесуге Конгресс мүшелері Грег Мерфи, Кэрол Миллер, Ронни Джексон, Уэсли Белл және Эдвард Кейс қатысты.
Кездесу кезінде Джейсон Смит АҚШ Президентінің арнайы сәлемін жеткізді. Оның айтуынша, Дональд Трамп оған кездесуге бірнеше сағат қалғанда, түнгі сағат екіде қоңырау шалған.
«Бүгін түнгі сағат екіде маған президент Дональд Трамп қоңырау шалды. Мен оған бірнеше сағаттан кейін Сізбен кездесетінімді айттым. Ол Сізге ең жылы лебізін жеткізуді және араларыңыздағы сенімді әрі сындарлы қарым-қатынас үшін ризашылығын білдіруді өтінді», – деді Джейсон Смит.
Осылайша, АҚШ Президенті Қазақстан басшысына деген жеке ықыласын білдіріп, екі ел арасындағы қалыптасқан сенімді әрі сындарлы байланысқа жоғары баға берген.
Кездесуде Қазақстан мен АҚШ арасындағы стратегиялық серіктестікті одан әрі дамыту мәселелері де талқыланды.
