Прокуратураның мәліметінше, жеке сот орындаушылары букмекерлік кеңселердегі ойын шоттарына қомақты қаражат аударып отырған. Олардың арасында бірнеше жыл бойы жүйелі түрде ақша салғандар да бар.
Мәселен, бір жеке сот орындаушысы үш жыл ішінде құмар ойындарға арналған шоттарына 139 миллион теңге аударған. Тағы бірінің осы мақсатқа жұмсаған қаражаты 26 миллион теңгеге жеткен.
Прокурорлық тексеру нәтижесінде мұндай әрекеттерге құқықтық баға берілді. Қадағалау органы жеке сот орындаушыларының қызметі азаматтардың құқықтары мен заңды мүдделерін қамтамасыз етуге бағытталғанын еске салды.
Прокуратура мұндай мінез-құлық маңызды функцияларды жүзеге асыратын тұлғалардың кәсіби әдеп қағидаттарына қайшы келетінін атап өтті. Сонымен қатар жеке сот орындаушыларының құмар ойындарға жүйелі түрде қатысуы осы институтқа деген қоғам сеніміне кері әсер етуі мүмкін.
Анықталған фактілер бойынша прокурорлық қадағалау актілері Алматы облысының Әділет департаменті мен Жеке сот орындаушыларының өңірлік палатасына жолданды.
Енді тиісті органдар анықталған заң бұзушылықтарға қатысты шаралар қабылдап, жеке сот орындаушыларының әрекеттеріне қолданыстағы заңнамаға сәйкес баға береді.
