Тергеу мәліметінше, ағайынды екеу синтетикалық есірткі өндірісін гараж ішінде жолға қойған. Нысан тұрғын үй ауласында орналасқан. Қылмыстық топтың әрекеті ұзақ уақыт бойы жасырын жүргізілген.
Жедел-тергеу іс-шаралары кезінде гаражға тінту жүргізіліп, есірткі өндірісіне қатысты бірқатар заттай дәлелдеме табылды. Атап айтқанда, 10 келіден астам «альфа-PVP» синтетикалық есірткісі тәркіленген. Сонымен қатар 860 литр химиялық сұйықтық, 300 литрлік реактор-сыйымдылық, зертханалық құралдар, электронды таразылар және жеке қорғаныс құралдары анықталды.
Тергеу барысында есірткі өндірісінің бір ғана гараждағы екі адамның әрекетімен шектелмегені белгілі болған. Өндіріс барысын «Signal» мессенджері арқылы байланыста болған куратор үйлестіріп отырған. Ол күдіктілердің жұмысын қашықтан бақылап, қажетті прекурсорларды жасырын орындарға жеткізуді ұйымдастырған.
Осылайша, қылмыстық әрекеттің бірнеше кезеңнен тұратын жүйе бойынша ұйымдастырылғаны анықталды. Күдіктілер синтетикалық есірткіні дайындау үшін арнайы құрал-жабдықтар мен химиялық заттарды пайдаланған.
Қазіргі уақытта аталған факті бойынша Қазақстан Республикасы Қылмыстық кодексінің 297-1-бабы бойынша сотқа дейінгі тергеу басталды. Екі күдікті де ұсталып, қамауға алынды.
Тергеу жалғасып жатыр. Құқық қорғау органдары қылмыстық схемаға қатысы бар өзге де адамдардың бар-жоғын анықтап жатыр.
Айта кетейік, есірткі өндіру және өткізуге қатысты қылмыстар үшін Қазақстан заңнамасында қатаң жаза қарастырылған. Қылмыстың ауырлығына және оның мән-жайына қарай жаза өмір бойына бас бостандығынан айыруға дейін баруы мүмкін.
Күдіктілердің кінәсі соттың заңды күшіне енген үкімімен ғана анықталатынын ескеру қажет.
