Алдымен Трамп дәстүрлі президенттік ұшаққа – Air Force One бортына отырған. Алайда көп ұзамай қайта түсіп, ұшаққа жалғанған кейтеринг контейнеріне кірген. Кейін контейнер әуежайдағы арнайы көлікпен басқа ұшаққа жеткізілген.
Осылайша, АҚШ президенті Air Force One емес, көлемі шағындау C-32A әскери ұшағымен Түркиядан ұшып кеткен. Бұл операция оның қауіпсіздігін қамтамасыз ету үшін құпия түрде ұйымдастырылған.
Ең қызығы, бұл туралы президентпен бірге жүрген журналистер мен Ақ үй қызметкерлерінің бір бөлігі білмеген. Олар Трамп әлі де Air Force One бортында деп ойлаған. Ал президент мінген C-32A ұшағы басқа бағытпен ұшып кеткен. Кейін Air Force One Трампсыз өз бағытымен жолға шыққан.
Трамптың айтуынша, ұшақты ауыстыру туралы шешімді Құпия қызмет пен әскерилер қабылдаған. Президент олардың нұсқауын орындауға мәжбүр болғанын айтып, бастапқы ұшақтың қауіп-қатері жоғары болғанын жеткізді.
«Олар менің басқа рейспен, басқа ұшақпен кеткенімді қалады. Мен олардың айтқанын орындауым керек», – деді Трамп.
Америкалық ақпарат құралдарының мәліметінше, қауіп Иран тарапынан болуы мүмкін шабуылға қатысты болған. Барлау қызметтері президентке немесе ол мінетін ұшаққа қауіп төнуі мүмкін екенін ескерткен. Қауіптің қаншалықты нақты болғаны ресми түрде толық ашылған жоқ.
Бұл тәсілдің мақсаты – президенттің нақты қай ұшақта екенін жасырып, ықтимал шабуыл жасаушыларды шатастыру. Air Force One-да журналистер мен Ақ үйдің кейбір қызметкерлері қалғандықтан, сырт көзге Трамптың президенттік ұшақпен кеткені көрінген.
Осылайша, Анкарадағы оқиға АҚШ президентінің қауіпсіздігін қамтамасыз ету үшін бұрыннан қолданылған құпия сапар тәсілдерінің ең ерекше үлгілерінің біріне айналды. Мұндай алдау тактикасы бұған дейін де қолданылған: мысалы, 2000 жылы президент Билл Клинтон Пәкістанға жасырын ұшақпен барып, Air Force One басқа ұшақпен бағытты қайталаған болатын.
