Оқиға Тарбағатай ауданында болған. Төтенше жағдайлар бөлімінің қызметкерлері қызмет барысында телевизиялық мұнараға шығып бара жатқан 5–6 жастағы екі баланы байқап қалған. Балалардың өміріне қауіп төнуі мүмкін екенін түсінген мамандар дереу полицияға хабар берген.
Ақпарат түскеннен кейін оқиға орнына Тарбағатай аудандық полиция бөлімінің учаскелік полиция инспекторы Диас Жұмаділов жедел жетті. Ол Тарбағатай аудандық төтенше жағдайлар бөлімінің аға инженері Архат Ниғмашевпен бірге әрекет етіп, балаларды телевизиялық мұнарадан қауіпсіз түсірді.
Осылайша, қызметкерлердің шұғыл әрі үйлесімді әрекетінің арқасында балалардың өмірі мен денсаулығына төнген қауіптің алдын алды.
Құтқарылған балалар кейін ата-аналарына тапсырылды. Полиция қызметкерлері ата-аналармен профилактикалық әңгіме жүргізіп, кәмелетке толмағандарды қараусыз қалдырмаудың маңызын түсіндірді. Сонымен қатар балаларды телевизиялық мұнаралар, құрылыс нысандары және басқа да қауіпті нысандардың маңына жібермеу қажеттігі ескертілді.
Құқық қорғау органдары ата-аналарды балалардың қауіпсіздігіне барынша мұқият болуға шақырады. Кішкентай балаларды қараусыз қалдыру олардың өміріне күтпеген қауіп төндіруі мүмкін. Сондықтан баланың қайда жүргенін бақылау, қауіпті орындарға жақындауына жол бермеу және қауіпсіздік ережелерін ерте жастан түсіндіру – ата-ананың басты міндеттерінің бірі.
Бұл оқиға ересектердің қырағылығы мен жауапкершілігі балалардың өмірін сақтауда шешуші рөл атқаратынын тағы бір мәрте көрсетті.
