САЙРАМ АУДАНЫ ТҰРҒЫНДАРЫ БЫЛҒАРЫ ҚОЛҒАП ШЕБЕРЛЕРІМЕН КЕЗДЕСТІ

Сөзімізге дәлел ретінде Сайрамда өткен тағылымы мол кездесуді айтуға болады. Жас спортшылардың сенімділігін арттырып, рухтандыру үшін ауданға бір топ спорт саңлақтары арнайы келіп, жасөспірімдермен жүздесті.
Кездесуге ел мақтанышына айналған, халықаралық ареналарда көк Туымызды желбіретіп, ел намысын абыроймен қорғаған атақты боксшылар – Мұхтархан Ділдәбеков пен Біржан Жақыпов қатысты. Спортпен қатар, өмірлік тәжірибесімен де үлгі бола білген чемпиондардың келуі жастар үшін ерекше оқиға болды.
Мұхтархан Ділдәбеков – аса ауыр салмақтағы халықаралық дәрежедегі спортшы. Ол 1999 жылы әлем чемпионатында және 2000 жылғы Сидней Олимпиадасында бокстан күміс жүлдені иеленген. Азия ойындарының бірнеше дүркін чемпионы, «Парасат» сыйлығының иесі. Қазақ боксының тарихында өзіндік орны бар спортшы талай жыл бойы ел намысын қорғап, жас буынға үлгі болып келеді.
Ал Біржан Жақыпов Қазақстан құрамасының көшбасшы боксшыларының бірі ретінде танымал. Ол әлемдік деңгейде жоғары нәтижелерге қол жеткізген әуесқой боксшы. Жеңіл салмақта өнер көрсеткен спортшы 2005 жылы әлем чемпионатының қола жүлдесі үшін тартысты бәсекеде бағын сынаған. Кейін 2010 және 2014 жылдары Азия ойындарының күміс жүлдесін жеңіп алды. 2013 жылы әлем чемпионы атанып, қазақ елінің мерейін үстем етті. Бүгінде қос спортшы да жастар тәрбиесіне ерекше көңіл бөліп, түрлі кездесулерге қатысып тұрады.
Жүздесу барысында чемпиондар спорттағы алғашқы қадамдары, жеңіліс пен жеңістің қайндай болатынын, қиындықтарды еңсеру жолдары туралы кеңінен әңгімеледі. Олар үлкен жетістікке жету үшін ең алдымен тәртіп, табандылық және үздіксіз еңбек қажет екенін де атап өтті. Спорттағы әрбір жеңістің артында ұзақ дайындық пен маңдай тер жатқанын түсіндіріп, жастарды ешқашан мойымауға шақырды.
Кездесу ашық форматта өткен. Жас спортшылар өздерін қызықтырған сұрақтарын қойып, чемпиондардан тұшымды жауап алды. Әсіресе, халықаралық жарыстарға дайындық, психологиялық төзімділік, спорт пен білімді қатар алып жүру мәселелері көпшіліктің қызығушылығын тудырды. Қонақтар әр сұраққа жан-жақты жауап беріп, өз тәжірибелерімен бөлісті.
Шара барысында жастардың бойындағы патриоттық рухты күшейтуге ерекше мән берілді. Танымал боксшылар ел намысын қорғаудың үлкен жауапкершілік екенін айтып, мемлекеттік Туды әлемдік ареналарда көтерудің қандай сезім сыйлайтынын жеткізді. Олар жастарды Отанды сүюге, ұлттық құндылықтарды құрметтеуге және қай салада жүрсе де елдің дамуына үлес қосуға шақырды.
Кездесуге қатысқан жасөспірімдер мұндай жүздесулердің өздеріне үлкен мотивация беретінін айтты. Өйткені олар кітаптан немесе теледидардан көріп жүрген спорт майталмандарымен бетпе-бет сөйлесіп, көкейлеріндегі сұрақтарға жауап алды. Бұл олардың болашаққа деген сенімін арттырып, жаңа мақсаттар қоюына ықпал етіпті.
Спорт майталмандары табандылық, тәртіп, еңбекқорлық пен отаншылдық құндылықтары жайында ой қозғап, жастарды биік мақсат қоюға, өз армандарына сеніммен қадам басуға шақырды. Олар спорт тек медаль мен марапат үшін емес, адамды шыңдайтын үлкен өмір мектебі екенін ерекше атап өтті.
Шара соңында болашағынан үлкен үміт күттіріп отырған жас спортшылар аға буыннан былғары қолғаптарына қолтаңба қойып беруін сұрады. Сонымен қатар, естелік суретке түсіп, чемпиондармен еркін әңгімелесу мүмкіндігіне ие болды. Ал сайрамдықтар ата дәстүрден аттамай, келген қонақтарға құрмет көрсетіп, шапан жауып шығарып салды. Бұл қазақ халқының қонақжайлығы мен үлкенге деген құрметінің тағы бір көрінісі болды.
Аудан басшылары жасөспірімдердің өмірден өз орнын табуына осындай кездесулердің ықпалы зор деп есептейді. Себебі мұндай тағылымды шаралар жастардың бойында жауапкершілік және отансүйгіштік қасиеттерді қалыптастырады. Сондықтан алдағы уақытта да танымал спортшылардың, қоғам қайраткерлерінің және түрлі сала мамандарының қатысуымен осындай кездесулерді тұрақты түрде ұйымдастыру жоспарланып отыр.
Жастар – елдің ертеңі. Ал олардың дұрыс бағыт алып, биік белестерді бағындыруына тәжірибелі аға буынның ақыл-кеңесі мен өнегелі өмір жолы әрдайым үлгі болмақ.