КЕНТАУДА МЕДИЦИНА ҚЫЗМЕТКЕРЛЕРІНІҢ КӘСІБИ МЕРЕКЕСІ САЛТАНАТТЫ ТҮРДЕ АТАП ӨТІЛДІ

Ақ халатты абзал жандардың ерен еңбегін ұлықтауға арналған жиынға қаладағы медицина ұйымдарының қызметкерлері, ардагер дәрігерлер, сала басшылары және құрметті қонақтар қатысты.
Мерекелік жиынға Кентау қаласының әкімі Жандос Тасов пен қалалық мәслихаттың төрағасы Қаблан Елеусізов қатысып, медицина қызметкерлерін кәсіби мерекелерімен құттықтады.
Қала әкімі өз құттықтауында денсаулық сақтау саласының қоғам өміріндегі айрықша маңызына тоқталып, медицина қызметкерлерінің халық алдындағы адал еңбегіне жоғары баға берді.
«Денсаулық сақтау саласы – адам өмірі мен денсаулығын қорғауға бағытталған ең жауапты әрі ең ізгі мамандықтардың бірі. Сіздер күн сайын халықтың саулығы үшін аянбай еңбек етіп, кәсіби біліктіліктеріңіз бен адамгершілік қасиеттеріңіздің арқасында талай жанға үміт пен өмір сыйлап келесіздер. Дәрігер мамандығы қашанда үлкен құрмет пен сенімге лайық», – деді Жандос Қалмырзаұлы.
Салтанатты рәсім барысында денсаулық сақтау саласының дамуына елеулі үлес қосып, қызметтік міндетін абыроймен атқарып жүрген бірқатар медицина қызметкерлері Кентау қаласы әкімінің Алғыс хатымен және «Қалаға сіңірген еңбегі үшін» төсбелгісімен марапатталды. Сонымен қатар үздік мамандарға Түркістан облыстық денсаулық сақтау басқармасының және Кентау қалалық мәслихаты төрағасының Алғыс хаттары табыс етілді.
Марапаттау рәсімі медицина саласы қызметкерлерінің көп жылғы еңбегі мен кәсіби шеберлігіне көрсетілген құрметтің айқын көрінісіне айналды. Денсаулық сақтау жүйесінің дамуына үлес қосып жүрген дәрігерлер, орта буын медицина қызметкерлері және сала ардагерлерінің еңбегі ерекше аталып өтті.
Іс-шара барысында қалалық Ардагерлер үйінің өкілдері де сөз сөйлеп, ұзақ жылдар бойы халық денсаулығын сақтау жолында еңбек еткен ардагер дәрігерлерге құрмет көрсетіп, олардың медицина саласына қосқан өлшеусіз үлесін жоғары бағалады. Бұл – өмірін адам саулығына арнаған ардагерлерге деген ізеттілік пен сабақтастықтың белгісі болды.
Медицина қызметкерлері – күн сайын адам өмірі мен денсаулығына жауапкершілікпен қарап, күрделі жағдайда кәсіби шешім қабылдайтын, өз ісіне адал мамандар. Олардың еңбегі тек ауруды емдеумен ғана шектелмей, халықтың өмір сүру сапасын жақсартуға, аурулардың алдын алуға және қоғам денсаулығын нығайтуға бағытталған маңызды қызметпен ұштасады.
Салтанатты кеш мәдениет сарайы өнерпаздарының концерттік бағдарламасымен жалғасты. Әсем ән мен күйден, көтеріңкі көңіл күй сыйлаған сахналық қойылымдардан құралған мерекелік бағдарлама ақ халатты абзал жандарға ерекше құрмет көрсетудің жарқын көрінісіне айналды.
Медицина қызметкерлері күніне арналған мерекелік іс-шара денсаулық сақтау саласы мамандарының қоғамдағы мәртебесін айқындап, олардың ел игілігі жолындағы адал еңбегіне көрсетілген шынайы құрметтің белгісі болды.