Сапалы жол, таза ауыз су, жарықтандырылған көшелер, қауіпсіз қоғамдық орта мен заманауи әлеуметтік инфрақұрылым – халықтың әл-ауқатын арттыратын негізгі факторлар. Президенттің «Халық үніне құлақ асатын мемлекет» тұжырымдамасы мемлекеттік органдардың жұмысына жаңа серпін беріп, азаматтардың ұсыныстары мен қажеттіліктерін нақты жобалар арқылы іске асыруға жол ашты. Осы бағыттағы жұмыстар Созақ ауданында да жүйелі жалғасып, ауылдық округтердің әлеуметтік-экономикалық әлеуетін арттыруға басымдық берілуде.
Соның айқын мысалының бірі – Қаратау ауылдық округінде жүзеге асып жатқан инфрақұрылымдық жобалар. Мұнда жолдарды жөндеу, елді мекендерді абаттандыру, инженерлік желілерді жаңарту және тұрғындарға қолайлы өмір сүру ортасын қалыптастыру бағытындағы жұмыстар кешенді түрде қолға алынған. Бұл тек жекелеген нысандарды салумен шектелмей, ауылдардың ұзақ мерзімді дамуына негіз болатын маңызды қадамдардың бірі саналады.
Аудан басшылығының округ тұрғындарымен кездесуі барысында өңірдің даму барысы жан-жақты сараланып, алдағы жоспарлар таныстырылды. Мұндай кездесулердің басты ерекшелігі – халық пен билік арасындағы ашық диалогтың қалыптасуы. Азаматтар өздерін толғандырған мәселелерді тікелей көтеріп, нақты ұсыныстарын жеткізуге мүмкіндік алады. Ал көтерілген мәселелердің жауапсыз қалмай, тиісті сала басшыларына нақты тапсырмалар берілуі мемлекеттік басқарудың жауапкершілік қағидатын күшейте түседі. Бұл өз кезегінде «Күшті Президент – ықпалды Парламент – есеп беретін Үкімет» формуласының жергілікті деңгейде жүзеге асуының нақты көрінісі болып табылады.
Қаратау ауылдық округінде жүзеге асырылатын жобалардың ішінде жол инфрақұрылымын дамытуға ерекше көңіл бөлінген. Ақсүмбе елді мекеніне кіреберістегі ұзындығы 12 шақырым болатын KXSZ-12 «КХ-57 «Созақ–Бақырлы–Ақсүмбе» автомобиль жолын жөндеу жұмыстарының аяқталуы ауыл тұрғындарының қатынасын жеңілдетіп қана қоймай, өңірдің экономикалық белсенділігіне де оң әсер етеді. Сапалы жол – тұрғындардың қауіпсіз қозғалысын қамтамасыз етумен қатар, кәсіпкерлік пен ауыл шаруашылығы өнімдерін тасымалдауға қолайлы жағдай қалыптастыратын маңызды инфрақұрылымдық элемент.
Сонымен қатар Бақырлы елді мекеніндегі бірнеше көшенің орташа жөндеуден өткізілуі мен Ақсүмбе ауылындағы Ақбикеш көшесіне ағымдағы жөндеу жұмыстарының жүргізілуі ауылішілік көлік қатынасының сапасын жақсартуға мүмкіндік береді. Мұндай жұмыстар тұрғындардың күнделікті тұрмысын жеңілдетіп, әлеуметтік нысандарға, білім беру және медицина мекемелеріне қатынауды анағұрлым қолайлы етеді. Инфрақұрылымды жаңғыртуға бағытталған мұндай бастамалар ауылдардың тартымдылығын арттырып, өңірдің тұрақты дамуына негіз қалайды.
Округтің дамуында инженерлік инфрақұрылымды жетілдірудің де маңызы зор. Бұған дейін Бақырлы елді мекенінде тәулік бойы сапалы ауыз сумен қамтамасыз ету жобасының іске асырылуы – халықтың өмір сүру сапасын арттырудағы маңызды нәтижелердің бірі. Жоба аясында терең ұңғымалардың қазылып, ауыз су жүйесінің тұрақты жұмыс істеуіне жағдай жасалуы ауыл тұрғындарының ұзақ жылдан бері көтеріп келген өзекті мәселелерінің шешілуіне мүмкіндік берді. Мұндай жобалар мемлекеттің әлеуметтік саясатындағы басты басымдықтардың бірі – халықтың тұрмыс сапасын жақсартуға бағытталған нақты жұмыстардың нәтижесін көрсетеді.
Қауіпсіздік пен жайлы өмір сүру ортасын қалыптастыру бағытында да бірқатар маңызды жобалар жүзеге асырылған. «Ауыл құтқарушысы» жобасы аясында өрт сөндіру бекеті мен мал тоғыту орнының салынуы төтенше жағдайлардың алдын алу мүмкіндігін күшейтсе, округтегі елді мекендердің ішкі көшелерінің толық жарықтандырылуы тұрғындардың қауіпсіздігін қамтамасыз етуге және қоғамдық кеңістіктің қолайлылығын арттыруға ықпал етті. Бұл жұмыстар ауылдардың заманауи талаптарға сай дамуына бағытталған кешенді саясаттың құрамдас бөлігі болып саналады.
Әлеуметтік инфрақұрылымды дамыту да назардан тыс қалған жоқ. Ақсүмбе мен Сарыжаз ауылдарында балалар ойын алаңдары мен кіші футбол алаңдарының пайдалануға берілуі өскелең ұрпақтың бос уақытын тиімді өткізуіне, бұқаралық спортты дамытуға және салауатты өмір салтын қалыптастыруға мүмкіндік береді. Ал Қаратау ауылдық мәдениет үйінің жөнделуі мен заманауи LED экранның орнатылуы мәдени өмірдің жандануына, қоғамдық іс-шараларды сапалы ұйымдастыруға жаңа мүмкіндік ашып отыр.
