Мерекелік шара аудан орталығы Темірлан елді мекеніндегі Қажымұқан Мұңайтпасұлы атындағы мәдени-спорт кешенінде ұйымдастырылып, «Қажымұқан – даланың дара батыры» атты салтанатты іс-шара аясында тағылымды басқосу өткізілді.
Жиынға зиялы қауым өкілдері, спорт ардагерлері, еліміздің әр өңірінен келген Қажымұқан бабамыздың ұрпақтары және қала тұрғындары қатысты. Аудан әкімі Азат Оралбаев өз сөзінде даңқты балуанның тек қазақ халқы үшін емес, күллі түркі әлемі үшін мақтаныш екенін атап өтті. Сонымен қатар мәслихат депутаты Бақдәулет Жұмабеков, Қажымұқанның немересі Нұрлан Қажымұқан және спорт саласының ардагері Қуат Байқожаев баба рухына тағзым етті.
Салтанатты шара бағдарламасына мәдениет үйі өнерпаздарының концерттері мен театрландырылған қойылымдар енді. Сондай-ақ, Қажымұқан рухына арналған ерекше күш көрсетілімдері – тас сындыру, темір майыстыру сияқты рекордтық шоулар көрерменге ұсынылды. Аталған шара мерейтой аясында жасөспірімдер арасында қазақ күресінен облыстық ашық турнирді де қамтыды.
Турнир барысында боз кілемге шыққан жас балуандар өзара мықтыларды анықтап, тартысты белдесулер көрермендерге ерекше әсер сыйлады. Ауқымды спорттық іс-шараға аудан тұрғындары, спорт жанашырлары және ардагерлер қатысып, ұлттық спорттың мәртебесін асқақтатты.
Қажымұқан Мұңайтпасұлының мерейтойы – қазақ спорт дәстүрін дәріптеуге, жас буынды ұлттық спортқа баулу мен олардың бойына батырлық рухты сіңіруге бағытталған маңызды мәдени-спорттық шара ретінде есте қалды.
