Далалық мектептердің негізгі мақсаты – фермерлерді агроорманмелиорацияның заманауи әдістерімен таныстыру арқылы жер ресурстарын тұрақты пайдалану және жайылымдық алқаптарды қалпына келтіру дағдыларын дамыту. Алматы облысында мектеп қазақ мал шаруашылығы және мал азығы өндірісі ғылыми-зерттеу институтының базасында көшпелі жайылым мектебі ретінде ашылады.
Шара барысында қатысушылар заманауи агротехнологияларды меңгеріп, топырақ құнарлылығын қалпына келтіру, мал шаруашылығының тиімділігін арттыру жолдарын үйренеді. Оқыту бағдарламасын аяқтаған соң қатысушыларға арнайы сертификаттар табысталады.
Министрліктің хабарлауынша, жобаның іске асуы Қазақстанның климаттық өзгерістерге бейімделуіне, ауыл шаруашылығы өнімділігін арттыруға және жайылымдардың тозуын азайтуға септігін тигізеді. Фермерлік далалық мектептер ауылшаруашылығы өндірушілеріне тұрақты жер пайдалану тәжірибесін ұсыну арқылы өңірдегі мал шаруашылығы мен жер ресурстарын тиімді басқаруға мүмкіндік береді.
