Қазақстан құрамасының сапында өнер көрсеткен жасанды интеллект саласының жас мамандары халықаралық додада жоғары нәтиже көрсетті. Әсіресе Даужан Бекетовтің көрсеткіші ерекше аталды. Ол IOAI 2026 олимпиадасының абсолюттік рейтингінде екінші орын иеленді.
Халықаралық олимпиада Астанада 2–8 тамыз аралығында өтті. Байрақты бәсекеге әлемнің әр түкпірінен жасанды интеллект бағытында білімін сынауға келген дарынды жастар қатысты.
Қатысушылар жасанды интеллект, алгоритмдер мен заманауи технологиялар саласындағы білімін көрсетіп, күрделі тапсырмаларды орындады. Олимпиада жасанды интеллект саласында болашақ мамандарды анықтап, олардың халықаралық деңгейде тәжірибе алмасуына мүмкіндік берді.
Қазақстан құрамасының барлық мүшесінің медаль иеленуі елдегі жасанды интеллект бағытындағы білім беру мен жас таланттарды қолдаудың нәтижесін көрсетеді. Екі алтын, екі күміс және төрт қола медаль – ұлттық құраманың халықаралық аренадағы табысты өнер көрсеткенін аңғартады.
IOAI 2026 олимпиадасының Астанада өтуі Қазақстанның жасанды интеллект және технология саласындағы халықаралық бастамаларға белсенді қатысып келе жатқанын да көрсетті.
Халықаралық олимпиаданың бас серіктесі – Kaspi.kz.
