Президент құттықтауында биылғы Абай күні елімізде жүзеге асырылып жатқан ауқымды өзгерістермен тұспа-тұс келіп отырғанын атап өтті. Оның айтуынша, Қазақстанның Халық Конституциясының заңды күшіне енуі және биліктің барлық институттарын жаңғырту үдерісінің басталуы елдің ұзақ мерзімді даму бағытын айқындайтын маңызды кезең болмақ.
Мемлекет басшысы бұл өзгерістердің түпкі мақсаты азаматтардың санасына жасампаздық құндылықтарын сіңіріп, Қазақстанның жаңа қарқынмен дамуына жол ашу екенін жеткізді.
Президенттің пікірінше, қоғамда жаңа этиканы қалыптастыру, ұлттық бірегейлікті нығайту және гуманистік құндылықтарды дәріптеу бағытында Абайдың мұрасы ерекше маңызға ие.
«Біз қоғамда жаңа этиканы қалыптастыру, ұлттық бірегейлікті нығайту және гуманистік идеалдарды дәріптеу барысында әрдайым Абайға жүгінеміз», – деді Қасым-Жомарт Тоқаев.
Мемлекет басшысы ұлы ақынның халық болашағы үшін білім, еңбек, жауапкершілік секілді қасиеттердің маңызын терең түсіндіргенін атап өтті. Абай өз шығармаларында елді бірлік пен келісімді сақтауға үндеп, қоғамның дамуы үшін білім мен еңбектің шешуші рөл атқаратынын көрсеткен.
Президент Абайдың қара сөздерінде айтылған тағылымды ойлар бүгінгі Қазақстанның құндылықтарымен үндесетінін атап өтті.
«Абай қара сөздерінің тағылымы қазіргі Қазақстанның құндылықтарымен толық үндеседі», – делінген Мемлекет басшысының құттықтауында.
Абай күні – қазақтың ұлы ойшылы, ақыны әрі ағартушысының рухани мұрасын дәріптеп, оның тағылымын кейінгі ұрпаққа жеткізудің маңызды мүмкіндігі. Ұлы ақынның білімге, еңбекке, адамгершілікке және ел бірлігіне үндеген өсиеттері қазіргі қоғам үшін де өзекті болып қала береді.
