Президент ұсынған «Күшті Президент – ықпалды Парламент – есеп беретін Үкімет» формуласы мемлекеттік органдардың халық алдындағы жауапкершілігін арттыруды, заң үстемдігін қамтамасыз етуді және қоғамдағы тұрақтылықты сақтауды көздейді. Бұл бағыттағы жұмыстар азаматтардың қауіпсіздігін қамтамасыз етіп қана қоймай, мемлекеттік институттарға деген сенімді нығайтып, құқықтық мәдениетті қалыптастыруға да ықпал етеді. Сондықтан өңірлерде қоғамдық қауіпсіздікке қатысты мәселелерді тұрақты түрде талқылап, олардың орындалуын бақылауда ұстау мемлекеттік саясаттың маңызды құрамдас бөлігіне айналып отыр.
Осы мақсатта Созақ ауданында аудан әкімі Мұхит Тұрысбековтің төрағалығымен терроризмге қарсы іс-қимыл, құқық бұзушылық профилактикасы және сыбайлас жемқорлыққа қарсы іс-қимыл жөніндегі ведомствоаралық комиссияның кезекті отырысы өтті. Басқосу барысында аудан көлеміндегі қоғамдық қауіпсіздік ахуалы, құқық бұзушылықтың алдын алу бағытында атқарылып жатқан жұмыстар және алдағы кезеңде жүзеге асырылатын профилактикалық шаралар жан-жақты сараланды. Сонымен қатар мемлекеттік органдар арасындағы өзара үйлесімді жұмысты күшейту мен жауапкершілікті арттыру мәселелеріне ерекше назар аударылды.
Комиссия отырысына құқық қорғау органдарының өкілдері, қорғаныс істері жөніндегі бөлім, төтенше жағдайлар бөлімі, өзге де құзырлы мемлекеттік мекемелердің басшылары, сондай-ақ кент және ауылдық округ әкімдері қатысты. Әртүрлі саланың мамандарының бір алаңда бас қосуы өзекті мәселелерді кешенді түрде қарастыруға мүмкіндік берді. Мұндай формат мемлекеттік органдар арасындағы өзара іс-қимылды жетілдіріп, қоғамдық қауіпсіздікке қатысты жұмыстарды тиімді үйлестіруге жағдай жасайды.
Күн тәртібіндегі мәселелер бойынша аудан әкімдігі ішкі саясат бөлімінің басшысы Ерлан Райымқұлов, Жуантөбе ауылдық округінің әкімі Дәуіржан Абраев және мемлекеттік-құқықтық әрі терроризмге қарсы іс-қимыл бөлімінің басшысы, комиссия хатшысы Ұлжан Шекеева баяндама жасады. Баяндамаларда аудан көлемінде атқарылып жатқан жұмыстардың нәтижелері сараланып, профилактикалық іс-шаралардың тиімділігі мен алдағы кезеңге жоспарланған міндеттер кеңінен талқыланды. Сонымен қатар қауіпсіздік саласындағы ведомствоаралық өзара іс-қимылды жетілдіру мәселесіне де ерекше көңіл бөлінді.
Жиында қоғамдық қауіпсіздік пен қоғамдық тәртіпке қарсы құқық бұзушылықтардың алдын алу мәселесі кеңінен қаралды. Аудандық полиция бөлімі бастығының орынбасары Ерман Нұрәділ интернет алаяқтығы, қаржылық алаяқтық және өзге де құқық бұзушылықтардың алдын алу бағытында атқарылып жатқан жұмыстар туралы баяндама жасады. Қазіргі таңда цифрлық технологиялардың кеңінен қолданылуына байланысты интернет арқылы жасалатын қылмыстардың саны артып отырғандықтан, тұрғындардың құқықтық сауаттылығын көтеру және ақпараттық-түсіндіру жұмыстарын күшейту маңызды міндеттердің бірі екені атап өтілді. Бұл бағытта халықпен тұрақты түсіндіру жұмыстарын жүргізу, азаматтарды сақтыққа шақыру және алдын алу шараларын күшейту қажеттігі айтылды.
Комиссия отырысында сыбайлас жемқорлыққа қарсы іс-қимыл мәселелері де жан-жақты қарастырылды. Мемлекеттік мекемелердегі ашықтық пен есептілікті қамтамасыз ету, сыбайлас жемқорлық тәуекелдерін анықтау және олардың алдын алу, мемлекеттік қызметшілер арасында адалдық қағидаттарын қалыптастыру бағытындағы жұмыстар талқыланды. Сонымен қатар тұрғындар арасында құқықтық мәдениетті арттыруға бағытталған ақпараттық-түсіндіру жұмыстарының ауқымын кеңейту қажеттігі сөз болды. Бұл жұмыстар Президент бастамашылық еткен «Адал азамат» тұжырымдамасының негізгі қағидаттарымен үндесіп, қоғамда заңға құрмет пен жауапкершілік мәдениетін қалыптастыруға бағытталған.
Жиын барысында аудан әкімі Мұхит Тұрысбеков күн тәртібіндегі әрбір мәселеге жеке тоқталып, жауапты мекемелердің жұмысына жан-жақты талдау жасады. Аудан басшысы көрсеткіштер мен есептерге ғана сүйенбей, нақты нәтижеге бағытталған жұмысты күшейту қажеттігін айтты. Сондай-ақ азаматтардың өтініштері мен арыз-шағымдарына уақытылы әрі сапалы жауап беру, профилактикалық жұмыстарды тұрақты жүргізу және мемлекеттік қызметте заңдылық пен ашықтық қағидаттарын бұлжытпай сақтау маңызды екенін ерекше атап өтті. Оның айтуынша, қоғамдық қауіпсіздікті қамтамасыз ету – барлық мемлекеттік органдардың ортақ міндеті.
