Аталған бастама Кентау қалалық Жастар ресурстық орталығының ұйымдастыруымен жүзеге асырылып, жазғы маусымда жастарды еңбекпен қамтуға мүмкіндік береді.
«Жасыл ел» бағдарламасы – жай ғана уақытша жұмыспен қамту жобасы емес. Бұл – жастардың бойында еңбекқорлықты, жауапкершілікті, тәртіпті және табиғатқа деген қамқорлықты қалыптастыратын маңызды әлеуметтік бастама. Бағдарламаға қатысушылар жаз бойы қаланың санитарлық тазалығын сақтауға, көгалдандыру және абаттандыру жұмыстарына атсалысып, туған қаланың ажарын аша түсуге өз үлестерін қосады.
Екінші маусымның басталуымен еңбек жасақтарының қатарына қосылған жастар алдағы уақытта саябақтар мен гүлзарларды күтіп-баптау, қоғамдық орындардың тазалығын сақтау, ағаштарды суару және қоршаған ортаны көркейту бағытындағы жұмыстарға белсенді қатысатын болады. Осындай игі істер арқылы олар тек еңбек тәжірибесін жинақтап қана қоймай, өзара ауызбіршілік пен ұйымшылдықтың, жауапкершілік пен азаматтық белсенділіктің маңызын тереңірек түсінеді.
Бүгінде «Жасыл ел» бағдарламасы көптеген жас үшін алғашқы еңбек жолына бастар баспалдаққа айналып отыр. Жазғы демалысты тиімді өткізумен қатар, адал еңбек арқылы табыс табуға мүмкіндік беретін жоба жастардың өмірлік тәжірибесін молайтып, олардың жеке тұлға ретінде қалыптасуына оң ықпал етеді. Сонымен қатар бұл бастама жастардың қоршаған ортаға ұқыпты қарау мәдениетін қалыптастырып, туған жердің тазалығы мен көркеюіне деген ортақ жауапкершілікті нығайта түседі.
Қала тазалығы – әрбір тұрғынның ортақ міндеті. Осы ретте «Жасыл ел» еңбек жасақтарының атқарып жатқан жұмысы қоғам үшін ерекше маңызға ие. Табиғатты аялап, қаланың гүлденуіне үлес қосып жүрген жастардың еңбегі – елге деген сүйіспеншілік пен патриотизмнің жарқын көрінісі.
Алдағы уақытта да еңбек жасақтары Кентау қаласының тазалығы мен көркін арттыруға бағытталған жұмыстарды жүйелі түрде жалғастырып, өңірдің экологиялық мәдениетін дамытуға және қаланың көрікті келбетін қалыптастыруға өз үлестерін қоса бермек.
