Тергеу нұсқасына сәйкес, күдікті 2014 жылы алдын ала келісілген топ құрамында әрекет еткен. Ол өзін делдал ретінде көрсетіп, компьютерлік техниканы жеткізіп беруге көмектесемін деген желеумен кәсіпкерді алдап соққан. Нәтижесінде жәбірленуші шамамен 1 миллион АҚШ долларынан айырылған.
Қылмыс жасалғаннан кейін күдікті ұзақ уақыт бойы құқық қорғау органдарынан жасырынып жүрген. Осыған байланысты оған халықаралық іздеу жарияланып, бірнеше елдің аумағында іздестіру шаралары жүргізілген. Тек 2025 жылдың қыркүйегінде ол Германияда анықталып, ұсталды.
Қазақстан тарапының ресми сұрауынан кейін Германия билігі күдіктіні экстрадициялау туралы шешім қабылдады. Бұл – халықаралық құқықтық ынтымақтастықтың нақты нәтижесі әрі ауыр қылмыс жасаған тұлғалардың жазадан жалтаруына жол бермейтін маңызды тетік.
Қазіргі таңда күдікті тергеу изоляторына қамалды. Іс бойынша тергеу амалдары жалғасып жатыр. Егер сот оның кінәсін дәлелдесе, оған мүлкін тәркілеумен қатар 10 жылға дейін бас бостандығынан айыру жазасы тағайындалуы мүмкін.
Бұл оқиға құқық қорғау органдарының жүйелі жұмысының нәтижесін көрсетіп қана қоймай, кез келген алаяқтық әрекет уақыт өте келе әшкереленетінін дәлелдейді.
